Dibad-baxyo xooggan ayaa saaka dib uga bilowday magaalada Laascaanood ee xarunta gobalka Sool, iyadoo dad careysan ay isugu soo baxeen gudaha magaalada.
Dadka bannaanbaxaya ayaa waxa ay ka careysan yihiin dilalka qorsheysan ee loo geysanayo haldoorka gobalka Sool, kuwaas oo in ka badan 15 sano ka soconaya Laascaanood.
Ciidamada Somaliland ayaa shalay rasaas la dhacay dad dhigayay bannaanbax, iyagoo dilay ugu yaraan 3 ruux, in ka badana dhaawacay.
Goobaha ganacsiga ee Laascaanood ayaa xiran, waxaana gabi ahaanba istaagay isu socodka magaalada.
Wasiirka Warfaafinta Puntland, Maxamuud Caydiid Dirir ayaa ku eedeeyay Somaliland inay iyadu fuliso dilal qorsheysan ee ka dhaca Laascaanood, oo lagu khaarajiyay dad ka badan 120 ruux tan iyo markii ay bilowdeen, isagoo xusay inay la kaashato kooxda argagixisada ah ee Al-Shabaab oo ay wada shaqeyn dhow la leedahay.
Bannaanbaxayaasha ayaa talaadadii beegsaday goobo ganacsi oo ay kamid yihiin shirkaddaha Telesom iyo Samtel, oo saldhigoodu yahay caasimadda Somaliland ee Hargeysa.
Laascaanood oo Somaliland ka qabsatay Puntland 2007dii, ayaa waxaa si joogta ah uga soconaya dilal qorsheysan oo ay fulinayaan kooxo aan la aqoon heybtooda, kuwaas oo loo geysanayo indheer-garadka magaalada.
Somaliland ayaa ka saartay sannado kahor magaalada dadka shacabka ah iyo ganacsatada kasoo jeeday deegaannada Koonfur Galbeed Soomaaliya, iyadoo ku eedeeysay dilalka ka dhaca magaalada. Balse talaadan ma joojin leynta haldoorka Laascaanood.
.
